SIBU: Projek tekat ai di Sentosa Salim ti benung digaga diatu nyadi siti projek ke besai reti ba tuju mutar penusah ampuh bah.

Kaban Kunsil Nengeri (ADUN) Bukit Assek Chieng Jin Ek madah, projek tekat nya digaga dua renggat, alai renggat keterubah disadang tembu bulan April taun tu.

“Tembu renggat keterubah, kereja renggat kedua projek deka berengkah.

“Nengah dua projek tu, kitai ngarap penusah ampuh bah di kandang endur tu ulih diputar," ku iya madah ngagai pemberita maya ngabas sekeda rumah ti ampuh bah di Sentosa Renggat 1 enggau Renggat 2, kena Hari Dua tu tadi.

Chieng nandu, ampuh bah ngenyit nyadi di Sentosa Salim ketegal ari kereja ngaga projek tekat ti benung dipejalai.

“Sentosa Salim sigi kandang endur tanah kerapa ti baruh agi ari endur bukai, ketegal nya sigi mudah ampuh, " ku iya.

Kelimpah ari nya iya madah, pengawa ngadu manah infrastruktur ba kandang endur suah ampuh mega deka dirumban.

Ku iya, kerejasama deka diatur enggau agensi perintah bukai nyengkaum Opis Residen. -EDISI UKAS