SELANGAU: Perintah Sarawak udah ngagihka bantu ngagai 1,052 orang tasah bah di kandang menua Selangau.

Kaban Kunsil Nengeri (ADUN) Tamin Ir Christopher Gira Sambang madah, empat Palan Ngenduh (PPS) udah dibuka naka ke diatu.

Tang ku iya, PPS Sekolah Kebangsaan (SK) Bukit Arip udah ditutup.

"Tiga mengkang dibuka iya nya PPS Dewan Serbaguna Selangau, PPS SJKC Tong Ah Selangau enggau PPS Dewan Penghulu Balang Sekuau," ku iya.

Iya mansutka jaku nya ba pengawa nyuaka bantu ngagai orang tasah bah ungkup Pelilih Selangau, kena Hari Dua.

Christopher nandu, ungkup sida ti diau lama ba palan ngenduh baka ari Rumah Harrison enggau Rumah Jimnun, bansa bantu bukai deka diperunding.

"Kami agi mansik tikas penyai dua buah rumah panjai nyabdikena nentuka bantu bukai ke patut diberi," ku iya.

Dulu agi ari nya, iya bisi ngabas PPS Dewan Penghulu Balang, Sekuau sereta PPS Sekolah Jenis Kebangsaan Cina (SJKC) Tong Ah, Selangau.-EDISI UKAS