KUCHING: Perintah Sarawak udah ngagihka RM1.085 bilion ungkup projek nganti paip ai lama di selampur nengeri.

Menteri Utiliti enggau Telekomunikasyen Sarawak Dato Sri Julaihi Narawi madah, projek mungkur pengawa nganti paip 2,740 kilometer pemanjai nya digaga dalam kandang lima taun.

Ku iya, projek deka dikemujur beberapa agensi baka Opis Bekal Ai Menua Pesisir Sarawak (JBALB), Opis Ai Kuching (LAK), Opis Ai Sibu (LAS) enggau Laku Management.

"Tu nyengkaum 461 projek deka digaga ngambi ulih nentuka sistem bekal ai efisyen sereta enda putus," ku iya.

Iya mansutka jaku nya lebuh dirandau media pengudah ngabas Palan Projek Nganti Paip Skim Rampangi I enggau II Pelilih Kuching ditu, Hari Tiga.

Nambahka jaku iya, Dato Sri Julaihi madah, 24 projek nganti paip ai lama 59 kilometer pemanjai deka digaga di Pelilih Kuching nengah agih belanja RM59 juta.

“Projek tu deka digaga dua agensi, iya nya JBALB enggau LAK.

“Ungkup JBALB, projek digaga chara berenggat dalam timpuh tiga taun keterubah alai ba 2024, semilan projek ti mungkur 42 kilometer paip digaga nengah belanja RM10.9 juta.

“Ba taun 2025, bisi enam projek 6.8 kilometer pemanjai ngena belanja RM2.2 juta, lalu ba 2026 bisi semilan iti agi projek 33.3 kilometer pemanjai ngena belanja RM4.5 juta,” ku iya.

Ba pekara bekaul, Dato Sri Julaihi madah, Rampangi siti ari tiga kandang endur ba Sitak Kunsil Nengeri (DUN) Pantai Damai ti kena bungkur projek.

Dua iti prpjek ke bukai iya nya ba Kampung Buntal enggau Kampung Santubong.

“Projek nganti paip lama di Rampangi begunaka belanja RM1.6 juta lalu udah berengkah ba bulan November 2024.

“Projek disadang tembu ba bulan Mei taun tu, alai diatu projek udah digaga 60 peratus," ku iya.

Bela datai, Sapit Menteri Utiliti Enggau Telekomunikasyen (Utiliti) Datuk Dr Abdul Rahman Junaidi.-EDISI UKAS