BINTULU: Bintulu Port Holdings Berhad (BPHB) ngerikod penguntung udah chukai manggai RM125.06 juta sepengudah nerima asil RM821.64 juta ungkup taun 2023.
Tu bepun ari chara ngatur enggau operasyen ti dipejalaika enggau mujur alai ba taun 2022 sida ngerikod RM819.79 juta ari kargo ke bisi 48.77 juta tan metrik lalu penyampau kapal ba taun 2023 mega ngerikod 7,708 enti dibanding 7,505 ba 2022, ngelui ari dipelaba, manggai 102 peratus.
Sekretari Perintah Sarawak ke mega Chairman BPHB Datuk Amar Mohamad Abu Bakar Marzuki enggau nya madahka diri berasai temegah ati enggau ripot taun 2023 nya.
"Taja mayuh betapi enggau penguji, BPHB mandangka pengepuh sereta pengeransing nempa pemujur," ku iya madah.
Iya madahka pekara nya nengah penerang media sepengudah Aum Besai Ninting Taun (AGM) Ke-28 BPHB, empai lama.
Kelimpah ari nya, Tuai Pegawai Eksekutif Kumpulan BPHB, Ruslan Abdul Ghani madah, Penyangkai Kapal Bintulu ke nyadi penyangkai kapal besai di Sarawak besedia deka nyukung pemansang ekonomi nengeri tu. -EDISI UKAS
