LAWAS: Penanggul sekut ba pos imigresen di Lawas patut diputarka enggau lengkas lebih agi ba Kompleks Imigresen, Kastam, Kuarantin enggau Pengelikun (ICQS) Merapok ti ngerikod kedua pemadu mayuh pejalai tama pansut nangkan ICQS Sungai Tujuh.
Menteri Pengangkut Sarawak Dato Sri Lee Kim Shin madah, Perintah Sarawak diatu benung ngelanggur pelin timpuh pandak dikena ngurangka penyekut ba ICQS di entara menua dia.
"Ungkup timpuh panjai, kitai deka berunding baka ni kitai ulih nambah pemanah jalai tama ditu ngambika enda kelalu sekut," ku iya madah ba aum media di ICQS Mengkalap Trusan ditu, Hari Empat.
Ke penemu mayuh, bisi 195,687 pejalai tama pansut nengah entara menua Mengkalab dirikodka sepemanjai taun 2023 lalu ari Januari nyentuk April taun tu penyampau nya ngerikod 73,221.
Lalu pejalai temuai nengah entara menua Mengkalab enggau Merapok di Lawas dalam kandang Januari ngagai April 2024 bisi 466,446.
Kelimpah ari nya, Dato Sri Lee madahka Imigresen Sarawak deka ngaga pelin timpuh panjai ungkup Sungai Tujuh, Pandaruan, Mengkalap enggau Merapok alai penerang nya deka dirandau begulai enggau Perintah Brunei.
Taja pia ku iya, Perintah Sarawak semina nyaup ngiga chara ke engkeman dikena mutar penanggul ketegal ICQS pegai Perintah Besai.
Bekaul ICQS Sungai Tujuh, Dato Sri Lee madah, Perintah Sarawak udah ngungkupka belanja RM4 juta dikena mutarka penanggul sekut ba endur nya.
"Kitai udah mansik penanggul ke nyadi di Sungai Tujuh alai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah ngemendarka belanja RM4 juta nyengkaum dikena nambah pemayuh kaunter," ku iya madah baru. -EDISI UKAS
