MIRI: Komiti Penyangga Penusah Ngenyit Pelilih (JPBB) Miri nerima pemeri RM300,000 ari dua orang dagang, Chung Kien Ping enggau Ivan Phua dikena mantu ngelempung belanja orang tasah ampuh bah.

Pengawa nyuaka pemeri dikemata Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg alai pemeri diterima Menteri Pengangkut Dato Sri Lee Kim Shin.

Pengawa diatur nyerumba penemuai ngabang Taun Baru China 2025 Datuk Patinggi Tan Sri Abang Zohari ke rumah kaling lama iya, Chung Tai Yu ditu, Hari Enam.

Dulu agi ari nya, Premier Sarawak sereta bini, Puan Sri Datuk Amar Juma’ani Tun Tuanku Bujang ngabang ngagai rumah Kaban Kunsil Nengeri (ADUN) Pujut ke mega Datuk Bandaraya Miri, Adam Yii Siew Sang urung jam 10.15 pagi.

Bela nyempulang Sapit Premier Sarawak Datuk Amar Awang Tengah Ali Hasan, Menteri Utiliti Enggau Telekomunikasyen Dato Sri Julaihi Narawi, Sapit Menteri Dagang Temuai, Industri Kreatif Enggau Seni Pemerindang, Datuk Sebastian Ting sereta Sapit Sekretari Perintah Negeri Sarawak (Perambu Ekonomi enggau Pemansang) Dato Sri Dr. Muhammad Abdullah Zaidel.-EDISI UKAS