KUCHING: Penusah ampuh ti nuntung Sarawak kenyau enam hari ke udah berengkah surut alai dua Palan Ngenduh (PPS) ditutup naka pagi Hari Enam.

Sapit Premier Sarawak, Datuk Amar Douglas Uggah madah, kandang endur ampuh diatu likun alai ai berengkah surut lalu kereja meresi dipejalai.

“Dua PPS di Bau udah ditutup lalu kitai meda ba sepemanjai Jalai Besai Pan Borneo ai udah mega surut.

“Di Bintulu, ai berengkah surut nitihka penerang ari Residen Bintulu, kereja meresi dipejalai diatu, " ku iya.

Iya mansutka jaku nya lebuh dirandau media maya ngabas Palan Ngenduh (PPS) di (PSS) Dewan Masyarakat Ranchan ditu, Hari Enam.

Taja pia, iya ke mega Chairman Komiti Penyangga Penusah Ngenyit Nengeri Sarawak (JPBNS) nandu, penyampau raban tasah bah di PPS di tujuh Pelilih menua bisi nambah naka Hari Lima.

“Naka kemari, 63 PPS dibuka di tujuh pelilih menua di selampur Sarawak lalu penyampau sida ke mindah bisi 12,692 iku ti ngarika 3,696 ruang bilik.-EDISI UKAS