MIRI: Sarawak beratika kuasa nuklear siti chara alternatif ba landskap kuasa jemah ila, tajapan pengeraja asal ti mayuh di nengeri tu nyendia peluang ngagai kuasa bukai.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, reaktor nuklear modular berpotensyel nyadi kuasa besai, tang pemar ngulihka uranium ngujungka kuasa nya enda praktikal di Sarawak.

“Nuklear begunaka uranium, alai uranium ukai sebengkah pengeraja asil ti muntang digiga. Tang Sarawak bisi pengelebih alai kitai bisi mayuh hidrogen, ukai aja ari metane, tang ari ai, " ku iya.

Iya mansutka jaku nya ba Pengerami Taun Baru China 2025 SUPP Pelilih Miri, Hari Lima.

Datuk Patinggi Tan Sri Abang Zohari nandu, hidrogen ulih dichampur enggau karbon dikena mansutka kuasa sintetik ti ngembuan potensyel nganti kuasa nuklear.

Diatu ku iya, Sarawak ngatur kerejasama enggau Jepun ba pengawa mansutka ammonia ti disadang nyadi kuasa ke diguna ba industri marin.

“Menteri Besai Jepun, Shigeru Ishiba bisi ngundang aku betemu enggau iya ngambi ulih berandauka pengawa mansutka ammonia sebagai ‘fuel of the marine industry’,” ku iya.

Bela datai Sapit Premier Sarawak Datuk Amar Prof Dr Sim Kui Hian enggau Datuk Amar Awang Tengah Ali Hasan, Menteri PengangkutSarawak Dato Sri Lee Kim Shin sereta Menteri Utiliti enggau Telekomunikasyen Dato Sri Julaihi Narawi.-EDISI UKAS