KUCHING: Pengawa ngaga Palan Seni Pemerindang Sarawak ditu penemu datai ari Royal Albert Hall, London ti disadang ulih nyadi kelai seni enggau main asal ke baru di nengeri tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, projek ti digaga ari pengawa ngubah begunan nya deka ngena belanja urung RM200 juta kelimpah ngaduka landskap urung RM60 juta disadang tembu ba taun 2027 ila.
Ku iya, palan nya siti ari infrastruktur ti meransang sereta nyungkak industri dagang temuai di Sarawak.
"Penemu ngaga langkar begunan tu diambi ari Royal Albert Hall di London, kelimpah siti agi di Amerika Syarikat.
"Reti iya palan seni tu bisi standard antarabansa alai kitai mega ulih ngangauka artis antarabansa mandangka pengelandik sida kitu," ku iya madah.
Iya madah munyi nya maya dirandau media udah Pengerami Bejadi & Nyerah Taba Projek Palan Seni Pemerindang ba laman Kompleks Begunan Kunsil Nengeri (DUN) lama ditu, Hari Empat.
Nambahka jaku iya, Datuk Patinggi Abang Zohari madah, palan nya deka mai empas ngagai industri seni enggau main asal di menua ti nyadi pelasar negapka agi pengelandik peranak menua.
Iya terang madah, dikena bejadika pekara nya, standard antarabansa ba pemansang palan seni nya patut ditan ketegal ngira matak pengerindu enggau sukung ari semua.
Bela datai maya nya Speaker Kunsil Nengeri Sarawak Tan Sri Datuk Amar Mohamad Asfia Awang Nasar, Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah, Sapit Menteri Dagang Temuai, Industri Kreatif enggau Seni Pemerindang Sarawak, Datuk Sebastian Ting Chiew Yew enggau Datuk Snowdan Lawan, Sapit Menteri ba Opis Premier (Pekara Korporat, Pemadah enggau UKAS), Datuk Abdullah Saidol sereta pemesai ke bukai. -EDISI UKAS
