KUCHING: Mayuh projek jematan ti digaga Opis Kereja Raya (JKR) Sarawak disadang ulih tembu ba pengujung taun tu.

Direktor JKR Sarawak, Ir. Ts. Gs. Br. Dr. Cassidy Morris madah, dua projek iya nya Jematan Marudi enggau Jematan Batang Lassa udah tembu lalu sepuluh agi ke bukai bela deka tembu digaga.

Ku iya, pemujur ngaga semua jematan tu asil ari pengeransing Perintah Sarawak nyendia projek pemansang ungkup pengelantang rayat.

“Pemujur tu bepun ari pengeran Perintah Sarawak nyendia infrastruktur lalu semua tu ari agih belanja nengeri sereta pengelandik JKR Sarawak.

"Tu mih pekara ke pemadu berat, kitai ngemujur semua projek," ku iya ba program 'Juh Randau' ti diatur Unit Komunikasi Awam Sarawak (UKAS) ditu, Hari Dua.

Ku iya nandu, rayat deka ngasai penguntung ari mayuh bengkah projek jematan ti dipejalai Perintah Sarawak nyengkaum Jematan Batang Rambungan, Jematan Sejingkat, Jematan Sungai Lingga, Jematan Batang Saribas 1, Jematan Batang Saribas 2, Jematan Batang Lupar 2, Jematan Sungai Limbang enggau Jematan Sungai Bunut No. 2.

Ari semua nya ku Dr. Cassidy, projek Jematan Batang Lupar 4.8 kilometer pemanjai nyadi jematan pemadu panjai meraka sungai di Malaysia.

Dikena nentuka projek tembu nitihka timpuh ditetap sereta efisyen, iya madah, JKR Sarawak udah ngena teknologi baru baka ke 'artificial intelligence (AI) monitoring systems' ti dikena ba projek Jematan Jepak di Bintulu.

“Kitai matau projek ngena 'real-time cameras'.

"Kitai ulih meda penyampau orang gawa ba endur projek. Tu mantu nyungkak pemanah kereja enggau atur pengelikun.

"JKR Sarawak mega suah datai meresa palan projek dikena nentu projek digaga enggau mujur," ku iya madah baru. -EDISI UKAS