KUCHING: Opis Kereja Raya (JKR) Sarawak diuluka Direktor Ir. Ts. Gs. Br. PMr. Dr. Cassidy Morris bisi ngatur penemuai basa ngagai Opis Unit Komunikasi Awam Sarawak (UKAS) ditu, Hari Dua.

Direktor UKAS, Awang Putrayusrie Awang Redzuan nyambut penatai raban JKR Sarawak ti disempulang Sapit Direktor (Infrastruktur), Ir. Wisil Lichok, Sapit Direktor (Begunan & Pakar), Sharifah Liz Farawati Wan Omar, Sapit Direktor (Servis Teknikal), Ts. Meehan Jorai, Sapit Direktoe (Sektor Modal Mensia enggau Pekara Korporat), Josenthiana Manggie sereta pengari Sapit Direktor (Aset), Ts. Mohammad Saifrol Sheikh Naimullah.

Tuju penemuai basa nya dikena negap kaul enggau kerejasama ba pekara komunikasyen sereta pekara bukai antara UKAS enggau JKR Sarawak.

Awang Putrayusrie bisi meri penerang senentang tanggung pengawa UKAS ti nyadi media Perintah Sarawak ba pengawa nyadung penerang perintah ngagai rayat.

Iya mega andal kerejasama UKAS enggau JKR Sarawak ba atur nyadung penerang bekaul projek pemansang ungkup rayat.

Direktor JKR Sarawak enggau nya madah, tuju penemuai basa nya deka nemu sereta meretika operasyen enggau chara kereja UKAS.

Ku iya, tu lebih agi ba chara nyadung penerang senentang mayuh bengkah projek rayat, pejalai projek enggau timpuh tembu projek ti dipejalai JKR Sarawak. -EDISI UKAS