KUCHING: Perdana International Anti-Corruption Champion Fund (PIACCF) diuluka Chairman Tan Sri Abu Kassim Mohamed bisi ngatur penemuai basa ngagai Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar di Astana Negeri Sarawak ditu, Hari Dua.

Bela nyempulang penemuai nya, Sapit Menteri Ba Opis Premier Sarawak (Integriti Enggau Ombudsman), Datuk Dr. Juanda Jaya.

Datuk Dr. Juanda madah, tuju penemuai dikena ngulihka penemu enggau ajar ari Tun Pehin Sri Dr. Wan Junaidi bekaul perambu ngatur 'program anti-rasuah' renggat antarabangsa di Sarawak.

Ku iya, program nyadi pelasar mandangka pengeransing Sarawak ba pekara integriti, nyeliah pengawa makai suap enggau chara kereja manah.

"Program disadang matak raban kaban parlimen antarabangsa, orang ti negika pengawa nyeliah makai suap sereta gerempung ti negika chara kereja manah," ku iya lebuh dirandau media pengudah penemuai basa nya.

Datuk Dr. Juanda nandu, randau bekaul enggau program mengkang bedau putus lalu nganti pemendar ari Tun Pehin Sri Dr. Wan Junaidi sereta Perintah kerajaan Sarawak sebedau ulih diatur.

"Tu siti atur besai dipejalai Perintah Sarawak dikena negapka pengawa nyeliah pengawa makai suap, ngangkat integriti, nentuka undang-undang diterit sereta mandangka chara Sarawak ba renggat global," ku iya.

Bela nyempulang Tuai Ombudsman Sarawak, Dato Sri Abdul Ghafur Shariff sereta Direktor Unit Integriti enggau Ombudsman Sarawak, Wan Mohamad Wan Drahman. -EDISI UKAS