KUCHING: Sarawak deka nyapai pemujur besai agi ba taun 2025 nengah penyerakup rayat ari mayuh pupu bangsa, kerejasama rat entara semua enggau pengeransing gawa nengah peluang baru ungkup pemansang nengeri.

Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol madah, pemar ti diasai ba taun ti udah ukai semina penguji, tang sebengkah ajar ti ngiring nuju pemujur besai agi jemah ila.

Iya madah penyerakup antara rayat ari mayuh bengkah pupu bangsa, main asal enggau batang pengarap nyadika penegap Sarawak.

“Peneleba ti diasai ngiring kitai nyingkang ke mua. Taun tu awak ngagai kitai semua ngadu kerejasama, beambi ulih ari peluang baru lalu nyapai pemujur besai agi.

“Sedia nerima penemu orang bukai, begulai manah sereta meretika ulah enggau asai ati orang bukai nyadi tiang pengelantang Sarawak ti meseti dinan.

"Tu mih kebuah kitai 'nyelai," ku iya madah serimbai Pengerami Taun Baru China 2025.

Datuk Abdullah ngelalau semua ngambika taun 2025 nyadika pelasar inovasyen, kerejasama profesional enggau pemujur ungkup pemaik semua serak komuniti.

Iya mega meri basa ngagai agensi perintah, Kompeni Bekaul Perintah (GLC), Gerempung Ukai Dikuasa (NGO) enggau semua rayat Sarawak ti udah ngadu kerejasama rat ti mantu pemansang nengeri.

“Aram kitai sama bela nempa pemujur, napi pemar nengah pengeransing beserakup lalu nentuka taun 2025 tu kitai nempa pemujur besai agi, " ku iya.

Datuk Abdullah mega besampi Taun Baru China serak tu mai pengelantang enggau jereki ngagai komuniti Tionghua di serata nengeri.

Iya ngujungka jaku enggau pengarap ngambika Sarawak semampai likun sereta lantang.– EDISI UKAS