KUCHING: Yang Di-Pertua Negeri Sarawak Tun Pehin Sri Dr Wan Junaidi Tuanku Jaafar deka ngatur program bejalai ngagai selampur nengeri tu.
Sapit Menteri Ba Opis Premier Sarawak (Pekara Korporat, Pemadah Enggau UKAS) Datuk Abdullah Saidol madah, program nya siti pejalai dikena semak agi begulai enggau rayat mayuh.
Ku iya, program nya mega deka mandangka ulah ke bendar dikembuan Tun Pehin Sri Dr Wan Junaidi ti endang ngembuan ati siru sereta mentas ngagai rayat.
"Tun Pehin Sri Dr Wan Junaidi deka ngaga program tu lalu program tu mega datai ari penemu kami.
"Kami ngelanggur program ke dipeda ulih nyadi pelasar mandangka ulah kebendar dikembuan iya enggau semak agi," ku iya madah.
Iya madahka pekara nya maya program nemuai basa ngagai Tun Pehin Sri Dr Wan Junaidi di Astana Negeri Sarawak, Hari Empat.
Datuk Abdullah mega madah, Tun Pehin Sri Dr Wan Junaidi bela besetuju deka bejalai nemuai ngagai selampur Sarawak lebih agi nemuai ngagai menua pesisir ke diwan rayat pupu bansa.
Berebak enggau nya Datuk Abdullah bela ngelaluka penatai Tun Pehin Sri Dr Wan Junaidi enggau bini, Toh Puan Fauziah Mohd Sanusi ngulu pengerami makai lemai beserimbai HAWANA kenaka 26 Mei tu ila ti bela digulu Menteri Besai Datuk Seri Anwar Ibrahim enggau Premier Sarawak Datuk Patinggi Tan Sri (Dr) Abang Abdul Rahman Zohari Tun Abang Openg.
Bela nyempulang penemuai basa tu iya nya Direktor UKAS, Samuel Simon, Tuai Pegawai Eksekutif Angkatan Zaman Mansang (AZAM) Sarawak Ali Suhaili, Presiden Gerempung Pemberita Sitak Kuching (KDJA) Ronnie Teo sereta bala pegawai UKAS ke bukai. -EDISI UKAS
