KUCHING: Perintah Sarawak udah ngubah undang-undang bekaul pemutus ngemendarka sektor prebet bela ngambi bagi ba pengawa ngasilka kuasa di nengeri tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Sarawak Energy Berhad (SEB) deka bejalaika pengawa besai ba pekara bekaul bekal kuasa.
"SEB siti agensi besai ti ngereja pengawa ngasilka kuasa taja ulih dikereja sektor prebet tang ba ekuiti mit nitihka SEB.
"Tang sida ulih ngasilka kuasa baikka ari solar tauka ngena chara ke disebut aku tadi lalu tu deka nambahka penyampau asil kuasa ngagai grid besai," ku iya madah.
Iya madahka pekara nya ba Pengerami Ramah Tamah Aidilfitri SEB di Menara SEB ditu, Hari Empat.
Nambahka jaku iya, Premier Sarawak madah, pekara bekaul undang-undang ke udah digaga enggau diubah nya deka nyaup Sarawak ngemansangka kuasa ulih dikena baru dudi hari.
Ku iya, enda lama agi, iya deka ke Bangkok, Thailand bekunsika penemu senentang pemansang kuasa ke digaga Perintah Sarawak.
"Aku diberi awak bekunsika penemu enggau orang Eropah di Poland lalu enda lama agi deka ke Bangkok nerangka chara Sarawak ngemansangka kuasa lebih agi kereban api fosil digaga nyadi kuasa ulih dikena baru," ku iya nerang.
Bela datai maya nya Sapit Premier Sarawak, Datuk Amar Professor Dr. Sim Kui Hian, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Menteri Ultiliti enggau Telekomunikesyen Sarawak, Dato Sri Julaihi Narawi, Sapit Menteri Utiliti enggau Telekomunikesyen (Telekomunikesyen) Datuk Liwan Lagang enggau Tuai Pegawai Eksekutif Kumpulan SEB Datuk Sharbini Suhaili.-EDISI UKAS
