KUALA LUMPUR: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg nerima gela Felo Kehormat Pertubuhan Perancang Malaysia (MIP) ti diberi ngelaika pemujur iya ba pengawa transformasyen Sarawak.

Datuk Patinggi Abang Zohari nerima gela nya ba Majlis Anugerah Kecemerlangan Perancangan MIP 2024 ti diatur ba siti hotel di Kuala Lumpur, Hari Lima.

Gela nya disua Menteri Besai Datuk Seri Anwar Ibrahim.

Nitihka penerang MIP, Datuk Patinggi Abang Zohari dipilih asil penyulut iya ngembing Sarawak nengah inisiatif pemansang mengeri, kuasa enggau pemeruan rampa menua.

Iya mega ngelengkas transformasyen Sarawak nengah inisiatif global seriris enggau Strategi Pemansang Pasca COVID-19 (PCDS) 2030 ti mujur ngangkat Sarawak nyadi nengeri bepemisi tinggi ba 2022, tujuh taun tumu ari tagit.

Kelimpah ari nya, Datuk Patinggi Abang Zohari mega udah ngangkatka Sarawak nyadi nengeri pengemun ba ekonomi gadung ti nagit enda mansutka karbon manggai 2030.

Ba pengerami ke sama, Opis Menteri Pengeraja Asal Enggau Pemansang Mengeri Sarawak (MUDeNR) bisi mega nerima Anugerah Presiden MIP.

Bela datai Sekretari Perintah Sarawak Datuk Amar Mohamad Abu Bakar Marzuki enggau Sapit Menteri Pemansang Mengeri, Tanah enggau Rampa Menua Sarawak Datuk Len Talif Salleh. - EDISI UKAS