KUALA LUMPUR: Perdana Menteri Datuk Seri Anwar Ibrahim madah atur meri gela Felo Kehormat Pertubuhan Perancang Malaysia (MIP) ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg sigi ngena ketegal iya udah mai pemansang ba mayuh bengkah pengawa di Sarawak.

Ku iya, Premier Sarawak siku tuai ti udah mandangka diak pengentap ba politik chukup berat, lalu meri pengelantang ngagai bala tuai ngemansang nengeri, nyerungkai idea sereta polisi baru.

“Iya ngiga jalai ba pekara kuasa baru, suah bejaku senentang pekara nya lalu ngiga awak ti tau mai penatai belanja ngagai nengeri.

“Aku deka madah diak atur milih Datuk Patinggi Abang Zohari chukup ngena ketegal iya udah mandangka chunto chara ngemansang nengeri, " ku iya.

Iya mansutka jaku nya ba Majlis Anugerah Kecemerlangan Perancangan MIP 2024 ti diatur di siti hotel di Kuala Lumpur, Hari Lima.

Dulu agi ari nya Dato Sri Anwar madah, pengering Sarawak ba hab kuasa deka ngangkatka nengeri nyadi pengemun ba pekara nya ba kandang ASEAN.

Menteri Besai mega nyuaka gela Felo Kehormat MIP ngagai Datuk Patinggi Abang Zohari.

Iya mega nyuaka Anugerah Presiden MIP ngagai Opis Menteri Pengeraja Asal enggau Pemansang Mengeri Sarawak. - EDISI UKAS

#UKASnews