KUCHING: Gempuru Besai Media Sarawak (SMEC) 2024 ti keterubah iya diatur taun tu dilanggur deka digaga nyadi program ninting taun.
Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol madah, SMEC 2024 diatur beserimbai Hari Pemberita Nasional (HAWANA) kenaka 25 ngagai 27 Mei tu.
Ku iya, program nya mega siti ari inisiatif mai raban media tetitihka singkang perintah Sarawak.
"Program tu engkeman diatur maya tu ketegal raban media betapi enggau revolusyen ari chara lama ngagai ke baru kelimpah Sarawak mega nyingkang ngagai digital ekonomi.
"Nya alai, udah maya iya alai raban media nyadi pelasar ke beguna dikena perintah enggau rayat negapka agi penemu bekaul kuing tuju ke digaga perintah Sarawak.
"Aku ngarapka Gempuru Besai Media Sarawak ulih digagaka nyadi program ninting taun nengeri," ku iya madah.
Iya madahka pekara nya udah ke ngatur penemuai basa ngagai Yang di-Pertua Negeri Sarawak Tun Pehin Sri Dr Wan Junaidi Tuanku Jaafar di Astana Negeri Sarawak ditu, Hari Empat.
Bekaul HAWANA 2024, Datuk Abdullah madah, sebagi ari program nyempulang iya nya program pemandang bekaul enggau pengawa ke udah digaga pengarang berita kenyau ari taun 50-an enggau 60-an menya.
"Kami madah ngagai Tun Pehin Sri Dr Wan Junaidi alai konsep tu bekaul enggau pejalai pengawa ke udah diasaika pemberita ari taun 50-an enggau 60-an suba laban sida nyadi raban ti nentuka pemesai reti 'merdeka' enggau penumbuh Sarawak sereta menua tu," ku iya madah baru.
Kelimpah ari nya iya mega madah, beberapa iti anugerah deka diberi maya nya ila baka Tokoh Kewartawanan lalu program enggau pengerami makai lemai bela deka digulu Menteri Besai Dato’ Seri Anwar Ibrahim enggau Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
Bela nyempulang penemuai basa tu iya nya Direktor UKAS, Samuel Simon, Tuai Pegawai Eksekutif Angkatan Zaman Mansang (AZAM) Sarawak Ali Suhaili, Presiden Gerempung Pemberita Sitak Kuching (KDJA) Ronnie Teo enggau Sapit Direktor UKAS Joachim Paggang Jabong. -EDISI UKAS
