KUCHING: Gempuru Besai Malin Temuai ASEAN keterubah deka diatur berengkah 24 ngagai 26 Oktober tu ila ba Hotel Imperial Kuching.
Program ke diatur Gerempung Malin Temuai Sarawak (SKTGA) nya mai pesan 'Saum Penyulut Ngembing Dagang Temuai', nempa kerejasama dikena nambah penemu sereta nyamin pengelantang ke tegap ba komuniti malin temuai ba Gerempung Menua Asia Tenggara.
Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah madah, malin temuai sebagi ari pemujur ngaduka sektor dagang temuai ti nempa kaul orang ke datai enggau daya idup sereta pesaka asal.
"Taja pia, bala temuai bisi mayuh chara ngulihka penerang enggau servis dagang temuai ba on-line enti dibanding ngelama tu lalu mai empas ngagai industri.
"Ukai semina nya, temuai mega ngira belanja ke dikena sida," ku iya madah ba aum media ditu, Hari Empat.
Nambahka jaku iya Dato Abdul Karim madah, dagang temuai sebagi ari servis ti meri 37 peratus ari semua penyampau Asil Dalam Menua Kasar (KDNK) Sarawak ba 2023.
"Kitai bulih RM9.99 bilion taun siti tadi iya nya nambah 101.41 peratus.
"Taja rikod tu manah tang kitai meseti nyaga sereta mandangka malin temuai," ku iya madah baru.
Gempuru besai tu dipelabaka deka digulu 400 diligit ke disadang tau mulaika RM3.3 juta penatai ngagai ekonomi.
Gempuru nya bela disukung Opis Menteri Dagang Temuai, Industri Kreatif enggau Seni Pemerindang Sarawak (MTCP), Opis Menteri Dagang Temuai, Seni enggau Main Asal Malaysia (MOTAC), Program Dagang Sarawak (BESarawak), Kaunsil Malin Temuai Malaysia, Opis Dagang Temuai Sarawak (STB) enggau Serakup Dagang Temuai Sarawak. - EDISI UKAS
