MIRI: Siti program rejister khas ungkup penerima Bantu Barang Diguna Sarawak (SKAS) deka diatur di Dewan Suarah Miri, belabuh ari 24 ngagai 26 Januari tu, ari pukul 8 pagi nyentuk 5 lemai.
 
Program diatur Sarawak Information Systems (SAINS) enggau kerejasama Unit Perambu Ekonomi (EPU), Kaunsil Multimedia Sarawak (SMA) enggau Unit Digitalisasyen Servis Perintah (SCSDU) dikena meri sukung ngagai penerima bantu ti napi pemar maya rejister Sarawak ID enggau S Pay Global.
 
Pia mega, kaunter servis di Palan Transformasyen Mengeri (UTC) Miri mega deka beoperasyen baka selama dikena ngemuntang pengawa rejister nya.
 
Pekara tu dipadah raban pengatur kanan SAINS dalam aum ti betuai ke Menteri Pengangkut Sarawak ke mega Kaban Kunsil Nengeri (ADUN) Senadin, Dato Sri Lee Kim Shin, di Begunan Baitulmakmur, ditu kena Hari Empat.
 
Dikena ngangkatka pengasi servis, Dato' Sri Lee mega merambu SAINS nyendiaka latih ngagai staf Palan Servis Kunsil Nengeri (DUN) di konstitusyen tu, ngambi sida ulih meri bantu ti manah agi ngagai penerima ti datai betunga mua.
 
Dikena nimbal pekara nya, SAINS setuju beratika pematut ngatur latih enda lama da lalu enti patut, latih deka dipejalai chara online. -EDISI UKAS