SPAOH: Peranak menua Spaoh ditu dipinta nyaga manah penyerakup ke endang dikembuan sida ti udah mayuh nyaup pemujur numbuhka pemansang di menua nya.
Sapit Premier Sarawak Datuk Amar Doulgas Uggah Embas madah, penyerakup nya lebih agi diguna nyerumba diatu mayuh projek pemansang benung digaga dia.
"Kitai ngarapka penyerakup tu semampai ulih ditegap sereta disungkak agi ngambika kitai meruan Segulai Sejalai napi semua penguji ke deka datai," ku iya madah.
Iya bejaku munyi nya maya Pengerami Hari Raya ke diatur raban bansa Melayu Kampung Spaoh ditu, empai lama tu tadi.
Nambahka jaku iya Datuk Amar Douglas Uggah madah, pelilih mit Spaoh nyengkaum Sitak Betong bisi pengulih sereta pemansang ke jauh manah agi dudi hari ila.
"Ba sitak bukai, Betong mega bisi Agensi Pemansang Sitak Betong ti ngaga sereta ngelanggur macham program pemansang.
"Nya alai, kitai enda ulih ngelakka nama-nama runding ti enda manah ke ulih nekul program pemansang tu," ku iya madah.
Ku iya, beberapa bengkah projek besai di menua nya deka tembu digaga taun siti agi.
Iya madah, tu nyengkaum STOLport Bebuling, Jematan Paku, Palan Giat Mara, Palan Ngumpul, Ngaga enggau Nungkus enda jauh ari STOLport enggau Palan Internet Komuniti.
"Ketegal nya kitai meda, pengerami nyambut Hari Raya siti agi pengerami ke ulih negapka kaul enggau pengelantang pengidup pupu bansa," ku iya madah baru.
Ba pengerami nya mega, Datuk Amar Douglas Uggah bisi madahka projek balai mensia mayuh ba pelilih mit nya deka digaga ngena belanja urung RM3 juta.
Kelimpah ari nya, iya mega bisi nyuaka geran bela RM50,000 ngagai 10 buah surau kelimpah RM200,000 agi ngagai Masjdi Darul Syifa. -EDISI UKAS
