KUCHING: Pekit Kriket Indu Antarabansa ke diatur International Cricket Council (ICC) di Sarawak ukai semina pekit aja tang bela nyadi awak ngagai bala pemain meda pemanah dikembuan nengeri Sarawak.

Menteri Raban Nembiak, Lumba Enggau Pemansang Orang Dagang, Dato Sri Abdul Karim Rahman Hamzah madah, ketegal nya program nemuai ngagai Kampung Budaya Sarawak diatur ngambika bala penyereta pekit semak agi meda etnik di nengeri tu.

Kelimpah ari nya, ku iya, sida mega dibai nemuai ngagai Semenggoh Wildlife Centre.

“Kami ngarap penyereta pekit ukai semina bulih peneleba ari main, tang peneleba ba main asal enggau penyelai dikembuan Sarawak," ku iya.

Iya mansutka jaku nya nengah teks ti dibacha Sapit Menteri Dato Gerald Rentap Jabu ba Pengerai Makai Lemai Pekit Kriket Indu Antarabansa ICC ditu, Hari Satu.

Iya mega madah, pekit dianti rayat serata dunya nya dipandangka enggau chara 'live' ngagai 180 bengkah menua nengah Star TV sereta platform media rama ICC baka Facebook, Instagram enggau YouTube.

Ngembuan lebih 106 juta kaban di serata dunya, pekit siti awak besai endur ngelaku Sarawak nyadi palan dagang temuai tebilang.

“Penyereta antarabansa ari Nigeria, Samoa, New Zealand enggau Afrika Selatan ukai semina bemain ba padang, tang ngasaika penyelai main asal Sarawak," ku iya madah baru.

Bela datai Sapit Menteri Dagang Temuai Sarawak Datuk Sebastian Ting Chiew Yew enggau Sapit Sekretari Perintah Sarawak (Operasyen), Datu Hii Chang Kee.-EDISI UKAS