KOTA SAMARAHAN: Program Ngerijista Sarawak ID enggau S PAY Global ngemuntang rayat nerima Sumbangan Keperluan Asas Sarawak (SKAS).

Sapit Menteri Pemansang Genturung Pendiau enggau Wilayah Datuk Rubiah Wang madah, program nya nyaup rayat ti patut nerima SKAS mutar penanggul ngerijista peminta.

"Aku deka madah bantu deka diagih berengkah 18 Februari 2025 lalu ulih dibelanja sepemanjai taun 2025.

"Perintah Sarawak udah bejalaika program SKAS dikena nentuka raban ti kurang penatai pemisi nerima bantu ti nyengkaum bantu barang dapur, barang ke amat diguna ba pengidup ninting hari," ku iya.

Iya mansutka jaku nya lebuh dirandau media maya ngabas Program Ngerijsta Sarawak ID enggau S PAY Global di Dewan Suarah Kota Samarahan, Hari Satu.

Datuk Rubiah ke mega Kaban Parlimen Kota Samarahan muji Opis Pelilih Samarahan enggau Opis Residen Pelilih Samarahan ti udah ransing nentuka sida ke minta SKAS dibantu.

Maya nya mega Kaban Kunsil Nengeri (ADUN) Stakan Datuk Hamzah Brahim madah, bantu SKAS siti inisiatif Perintah GPS nengah pegai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ti ulih ngelempung tating belanja rayat Sarawak.

Bisi 2,000 iku rayat ke diau ngelingi Kota Samarahan datai ngerijista bantu ba program ke diatur tiga hari berunggu nya. -EDISI UKAS