KAPIT: Perintah Sarawak majak ka program nyukat Tanah Hak Adat Bumiputera (NCR), nyaup nyaga enggau ngintu hak orang bempu tanah.

Sapit Menteri Digital Datuk Wilson Ugak Kumbong madah, inisiatif nya seriris enggau juluk ati pemansang nengeri nengah slogan Sarawak Maju Makmur.

Ku iya, pengawa nyukat tanah NCR mandangka pengeransing perintah ba atur nentuka tanah rayat dibasa lalu ulih dikemansang ungkup pengelantang rayat jemah ila.

“Tu mandangka pengiruh perintah nentuka tanah rayat diintu manah lalu ulih dikemansang jemah, " ku iya.

Iya mansutka jaku nya maya Program Randau Nyukat Tanah NCR Seksyen 18 di Rumah Melinggang, Sungai Majau, Mujong ditu, empai lama tu tadi.

Iya ke mega Kaban Parlimen Ulu Rajang mega ngelalau Opis Tanah Enggau Penyukat (JTS) ngambi bejalaika tusun pengawa nyukat enggau betul ngambi ulih nentuka hak orang bempu tanah dipejurai enggau manah.

Bela datai Kaban Kunsil Nengeri (ADUN) Baleh Nicholas Kudi Jantai enggau ADUN Pelagus Wilson Nyabong Ijang.-EDISI UKAS