BETONG: Kolej Vokasional Betong siti institusyen nempa modal mensia betikas tinggi ba bidang vokasyenal enggau pengelandik kenyau ditumbuh ba taun 1984.

Sapit Menteri Nembiak, Lumba Enggau Pemansang Orang Dagang Sarawak Dato Gerald Rentap Jabu madah, tikas diambi gawa sida ti nembuka pelajar ba kolej nya udah nyapai rikod 100 peratus.

Kelimpah nempa graduet bepengelandik, kolej nya ku iya bela bejalaika tanggung pengawa nempa modal mensia sereta nyaup pemansang ekonomi Sarawak.

“Tu mandangka raban nembiak ti udah nembuka pelajar ba Kolej Vokasional Betong ulih nangkup peminta gawa.

“Nengah kapasiti manggai 900 nembiak enggau tikas enrolmen 86 peratus, aku pechaya kolej tu ulih nyaup ngemansang ekonomi lebih agi di Betong, " ku iya.

Iya mansutka jaku nya ba Pengerami Apresiasyeb enggau Penyulut Kolej Vokasional Betong Taun 2024 ditu, empai lama tu tadi.

Iya mega ngelalau nembiak ngambi awak ke disedia ba industri baru baka ekonomi digital, kuasa gadung enggau pengawa nyimpan karbon ti benung ngerembai bepun ari embing Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Pengerami maya nyabdigulu lebih 500 alai 243 nembkak nerima mayuh bengkah gelar nyengkaum 'Anugerah Pengarah Tahun 2024' .

Gelar pemadu tinggi ungkup Program Diploma Vokasional Malaysia (DVM) diberi ngagai Crosby Melvyna Saimi ari Program Diploma Perakaunan, lalu Nur Izzah Hazirah Iswandi nerima gelar ke sama ungkup Program Sijil Vokasional Malaysia (SVM) ari Program Sijil Perakaunan. -EDISI UKAS