BETONG: Projek ngaga replika kubu Rentap, bujang berani tebilang Iban deka berengkah taun 2025.

Sapit Premier Sarawak Datuk Amar Douglas Uggah Embas madah, projek diatu benung nganti pemendar ari agensi perintah ngambi ulih berengkah digaga.

“Kitai diatu bisi agih belanja penyampau RM16 juta ungkup pengawa ngaga kubu sereta infrastruktur bukai ba palan asal di Bukit Sadok," ku iya.

Iya mansutka jaku nya ba 'Malam Penghargaan Majlis Daerah Betong' di Dewan Tan Sri Datuk Amar Stephen Kalong Ningkan ditu, kena Hari Minggu.

Datuk Amar Douglas Uggah nandu, dagang temuai antara sebengkah sektor ti keran dikemansang ba Pelilih Betong kelimpah ari pengawa betanam betupi moden.

“Betong bisi mayuh palan ti tau matak temuai datai, kitai meseti nyendia pelin pemansang kelimpah ransing ngelaku palan tu ngagai orang luar.

“Agensi Pemansang Pelilih Betong (BDDA) enggau Opis Residen sereta Opis Pelilih Betong meseti megai tanggung pengawa begulai enggau raban orang tauka agensi ti bekaul enggau industri.

“Sida meseti ngadu kerejasama ba atur ngemansang sereta nambah pemanah palan pematak temuai baka rumah panjai lama ke beumur beratus taun, main asal sereta pemanah rampa menua, " ku iya.

Iya madah, Betong diatu muntang dilawa nengah Jalai Besai Pan Borneo, lalu pengudah Jalai Tebing Tasik sereta STOLport di Spaoh tembu, penyampau temuai ke Betong disadang nambah.

“Rayat ti diau ngelingi nyengkaum orang bumai, orang ti nyendia program nyemilik, sida ke nyual asil pengelandik jari enggau pemakai meseti nguna awak tu.

“Ketegal nya, semua kitai meseti nentuka Betong, Spaoh, Debak sereta kandang endur bukai seruran andal sereta siruka bala temuai, " ku iya.

Bela datai Kaban Parlimen Betong Datuk Dr Richard Rapu enggau Residen Betong Richard Micheal Abunawas. -EDISI UKAS