KANOWIT: Kaban Kunsil Nengeri (ADUN) Ngemah, Anyi Jana datai meri sukung ngagai peranak Rumah Paulus Yan ti ditinggang penusah angus rumah panjai ba Palan Ngenduh Sementara (PPS) Dewan Datuk Aaron kena Hari Lima.

Rumah panjai 15 pintu nya angus ba penusah ti nyadi ke 15 Januari, ngujungka 15 ruang bilik nadai endur diau agi.

Ngelaika sukung, Anyi nyuaka bantu bakul pemakai ngagai semua ruang bilik.

Iya mega ngagihka geran Projek Mit Menua Pesisir (MRP) penyampau RM15,000 ngagai Komiti Pengelikun enggau Pemansang Genturung Pendiau (JKKK) Rumah Paulus Yan.

Jana mega meri agih belanja RM120, 000 nengah Program Transformasyen Menua Pesisir ungkup pengawa ngaga baru rumah panjai.

“Aku gaga sereta meri basa ngagai pengeran ari semua nyengkaum agensi perintah, kompeni enggau mensia mayuh ti udah meri bantu ngagai peranak Rumah Paulus.

"Pengawa tu mandangka semengat kerejasama ti tinggi mantu komuniti," ku iya.

Iya mega muji Komiti Penyeliah Penusah Pelilih Kanowit, Bomba, Polis, Angkatan Pertahanan Awam Malaysia (APM), Jabatan Sukarelawan Malaysia (RELA), Opis Pengintu Pengelantang enggau Opis Pengerai ti udah mayuh meri bantu.

Anyi Jana madah pengeransing Perintah Sarawak nengah kerejasama mayuh bengkah agensi udah nentuka nasib enggau pengelantang sida ke ditinggang penusah diintu manah.- EDISI UKAS