MUKAH: Rumah Panjai Sendri Anak Senabong di Ulu Sebakong nyadi model inspirasyen ba inisiatif pemansang menua pesisir.

Ku Kaban Kunsil Nengeri (ADUN) Tellian, Royston Valentine, iya muji produktiviti peranak dia ti ngena peluang Skim Jali Ngentak Baru Rumah Panjai di baruh Perintah Sarawak.

“Rumah Sendri nyadi chunto pemadu manah baka ni tuai renggat baruh, baka tuai rumah, bejalaika pangku pengawa nyadi jematan entara peranak enggau perintah.

Skim tu udah ngerumban pengawa ngaga rumah panjai ngena ungkus pemadu mit RM100 sebulan sepintu, meri pemaik besai ngagai 22 pintu bilik ditu,” ku iya ba pejalai ngabas kia empai lama.

Iya mega meri perati ngagai pemesai guna kualiti ba pejalai projek RTP baka Projek Ngaga Baru Dataran Kejat ti benung digaga ba mua Rumah Sendri.

“Pejalai projek tu siti pangku pengawa besai. Aku ngarap ke kunteriktor gawa enggau kualiti sereta integriti, nentuka perengkaguna tu meri pemaik timpuh panjai ngagai rayat,” ku iya nyemetak.

Royston mega madah ke pengirau diri pasal ulah sekeda kunteriktor ti semina ngira untung aja.

Nya alai iya minta kunteriktor gawa enggau penuh tanggungpengawa laban tetiap projek ti dilanggur nya ngena ungkus enggau timpuh ti panjai.

Rumah Sendri, berengkah digaga dalam taun 2020, diatu nyadi kelai pemujur inisiatif Perintah Sarawak dalam nyukung pengelantang rayat menua pesisir nengah skim enggau insentif strategik.

Pejalai gawa nya mandangka pengeransing perintah nengeri negapka pemansang menua pesisir, lebih agi di sitak Tellian.-EDISI UKAS