MARUDI: Baram badu nyadi sitak jauh di entigis pengudah Jematan Marudi tembu lalu ngemuntangka pejalai entara Marudi enggau Miri.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, dalam Langgur Pemansang Malaysia Lumpar Ke-13 (RMK-13) jalai ke bisi ari Miri ke Marudi deka diseleti.

Nambah ke nya ku iya, jalai ari Marudi ke Long Terawan terus ke Long Iman enggau ke Limbang mega deka digaga.

“Pengawa kitai udah tu ngemansangka sitak menua tu ari nyendiaka akses jalai.

“Lalu di baruh Langgur Pemansang Malaysia Lumpar Ke-13 (RMK-13) di baruh Agensi Pemansang Tanah Tinggi (HDA), semua pengari rayat di sitak Baram tu deka gawa ngemansangka serap sitak tu.

“Uji peragam, kitai ngemansangka semua tu nengah siti jalai ari Long Iman terus ke Limbang. Reti iya, Baram badu agi nyadi menua entigis ti jauh dilawa, tang Baram deka nyadi sitak besai ungkup pemansang tu.

“Enti aku enggau bala bakih aku ulih ngaga jematan tu, ba taun 2030, engka kitai ulih deriba datai ke Limbang," ku iya.

Iya nyebut jaku nya lebuh Pengerami Bejadi Jematan Marudi ditu kena Hari Lima.

Pengawa bejadi Jematan Marudi ti beungkus RM116.5 juta nya kelai siti da pemujur besai dijapai Perintah Sarawak negapka aksesibiliti, nambah peluang ekonomi, enggau ngangkatka pengelantang rayat.

Premier Sarawak madah baru, nengah rentayan infrastruktur ti menyana agi, sitak nya diatu sedia nyadi penyungkak ngagai pengawa beranakka puku strategik, pemansang komprehensif, enggau transformasyen sosio-ekonomi ti meri pemaik timpuh panjai ngagai selampur Sarawak.

Iya madah, projek nya mega nyadi sebagi ari rentayan infrastruktur besai ti nyambung bagi menua baka Miri, Marudi, Limbang, Lawas, Mulu, enggau menua sepiak, Brunei sereta Sabah.

“Perintah Sarawak mega benung ngelanggur ngaga penyangkai kapal tasik dalam di Kuala Baram lalu deka nyadi akses besai kapal layar ngambi temuai nyamai datai ke Mulu enggau Niah laban kededua endur nya diaku UNESCO lalu meransang ekonomi peranak di sitak nya,” terang iya.

Sama datai ba pengawa bejadi jematan nya Sapit Premier Sarawak, Datuk Amar Douglas Uggah Embas, Menteri Pengangkut Sarawak, Dato Sri Lee Kim Shin, Menteri Industri Pemakai Komoditi enggau Pemansang Kandang Menua, Dato Sri Dr Stephen Rundi Utom, Sekretari Perintah Sarawak, Datuk Amar Mohamad Abu Bakar Marzuki, Sapit Menteri Pengerai Mensia Mayuh, Pengawa Berumah enggau Perintah Lokal (Perintah Lokal), Datuk Dr Penguang Manggil, Kaban Parlimen Baram, Dato Anyi Ngau sereta temuai dipebasa ke bukai. -EDISI UKAS