KUCHING: Opis Kereja Raya (JKR) Sarawak nyadi pugu besai nyendiaka bemacham pemansang ngagai rayat.
Sapit Premier Sarawak, Datuk Amar Douglas Uggah Embas madah, JKR Sarawak udah mayuh mantu mutarka projek tejanggal di kandang menua tu, lalu nyapai juluk Sarawak neruska pemansang beguna lebih agi ngagai rayat di kandang menua pesisir.
Iya madah, nya nyengkaum pemujur dijapai Opis Menteri Infrastruktur enggau Pemansang Penyangkai Kapal (MIPD) ngena belanja RM799.52 juta ungkup pemansang.
“Laban enti nadai kita ba taun 2024, kitai enda ulih ngena belanja sepenyampau RM799.52 juta ti diagih.
“Nya alai, ari semua pemeras kita gawa, kitai mujur ngena belanja 95.2 peratus ari agih belanja opis menteri ungkup pemansang,” ku iya.
Iya nyebut jaku nya lebuh bejaku ba Pengerami Makai Lemai Gempuru Opis Kereja Raya (JKR) Sarawak 2025 di Palan Konvensyen Borneo Kuching (BCCK) ditu kena Hari Tiga.
Berindik ari nya, iya meransang JKR Sarawak terus nyulut lebih agi kandang tiga bulan keterubah taun tu ngambi mutarka isu infrastruktur jai lebih agi jalai ketegal gaya hari enda manah.
Ba sekeda sektor ti enda entu ngemantupka ati, iya ngarap ke JKR Sarawak begulai enggau MIPD ulih manah agi pengawa ba taun tu lebih agi ba pekara belanja pemansang begunan mensia mayuh enggau begunan perintah.
“Pengudah nyerenih prestasyen 95 peratus belanja pemansang taun 2024, aku beratika sekeda sektor enda mandangka prestasyen manah baka ke bukai.
“Ambi ke chunto, P004 iya nya begunan mensia mayuh, kitai semina mujur ngena belanja 83 peratus ari bajet, seraya P003, begunan perintah, kitai ngena belanja 89 peratus,” terang iya.
Ba pengerami nya, Datuk Amar Douglas Uggah ti mega Menteri MIPD diberi basa ngelancharka Taga Penyampau Rega 2024 JKR Sarawak enggau Gaya Langkar Jalai Semin ba Atur Malin Standard JKR R1.
Bela disua iya nya Anugerah Rekrut Baru Nyulut ngagai Norsila Noh, Vancester Ripon enggau Esther Tay Sze May seraya Ts Chang Teck Khung enggau Ts Lau Pit Hwa bela nerima Anugerah Merit Penyeliaan Projek enggau Anugerah Nyulut Bejalaika Projek.
Sama datai dua Sapit Menteri MIPD Datuk Ir Aidel Lariwoo enggau Dato Majang Renggi, Sekretari Mendam MIPD Datu Chiew Chee Yaw, Direktor JKR Sarawak Ir Dr Cassidy Morris sereta bala temuai dipebasa ke bukai. -EDISI UKAS
