DALAT: Sekula jauh di menua ulu ukai nyadika kebuah nembiak enda diberi perengka guna ti sebaka enggau sekula ba kandang mengeri.

Menteri Pemansang Orang Indu enggau Pengelantang Komuniti, Dato Sri Fatimah Abdullah madah, pemujur ba pekara pelajar mengkang dikemerat tajapan jauh di menua ulu.

Ku iya, pemujur ukai semina ditempa ketegal ti ngembuan perengka guna ti chukup, tang bela bepun ari pengeran belajar nguna perengka ke bisi.

“Taja pan jalai bepasir, tu mandangka sekula nguna perengka guna ti dikemisi enggau betul, " ku iya ba Pengerami 'Anugerah Kecemerlangan dan Apresiasi Pelajar SK Kampung Klid/Plajau' ditu, kena Hari Dua.

Dato Sri Fatimah ke mega Kaban Kunsil Nengeri (ADUN) Dalat bela meransang nembiak ke diau ngelingi sekula diau ba buding ngambika sida diajar pekara disiplin sereta nemu ngintu awak enggau manah.

“Ba buding, maya makai, belajar sereta bemain udah diatur sekula, tu ngajar nembiak ngambi ngembuan disiplin, " ku iya.

Kelimpah ari nya, iya mega ngansak apai indai nganjung anak sida ngagai tadika, nyadi siti chara tumu ba tuju nempa modal mensia ti betikas tinggi.

Ba pengujung pengerami, Dato Sri Fatimah bisi nyuaka pemeri beserimbai Taun Baru Cina ngagai nembiak SK Kampung Klid/ Plajau.

Bela datai Kepala Pengajar SK Kampung Klid/ Plajau Razeli Sirat. - EDISI UKAS

#UKASnews
#SaluranInformasiRakyat
#SarawakMajuMakmur