BINTULU: Sarawak Petchem keran nyadi chunto ba renggat antarabansa bekaul industri kuasa gadung ari pengawa mansutka metanol gadung.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Sarawak Petchem ngembuan juluk ati deka nyadi pengepun ba atur transformasyen nuju kuasa gadung.

“Enti kitai mujur ngasilka metanol gadung enggau kuasa gadung ke bukai, tu ulih nyadi kuasa ti dikena ba industri aeroangkasa.

“Ba industri aeroangkasa, kitai meseti bisi kaul enggau kuasa ti dipansut nengah proses kimia,” ku iya.

Iya mansutka jaku nya ba Pengawa Nasih Tanah Loji Methanol Gadung ba Petchem Sarawak ditu, kena Hari Dua.

Kelimpah ari nya, Premier Sarawak mega ngelalau raban nembiak Sarawak belajarka industri kuasa baru ngambika nengeri tu ulih nempa pemujur ba industri kuasa.

Dulu agi ari nya, Datuk Patinggi Abang Zohari bisi ngemata ‘Sail Away of Sarawak Petchem’s Methanol Export Cargo’ alai dua kapal ti ngundan 20,000 tan metrik metanol belayar ke China.

Ba pengawa nya, iya mega bisi nyuaka setipikit pemujur 25 Juta Jam Kerja Selamat Tanpa Kecederaan Masa Kerugian ngagai beberapa iti kompeni.

Bela datai Sapit Premier Sarawak, Datuk Amar Profesor Dr Sim Kui Hian, Speaker Kunsil Nengeri Sarawak Tan Sri Mohamad Asfia Awang Nassar, Sekretari Perintah Sarawak Datuk Amar Mohamad Abu Bakar Marzuki enggau Chairman Sarawak Petchem Tan Sri Datuk Amar (Dr) Abdul Aziz Husain. -EDISI UKAS