KUCHING: Bala nembiak ti nampung pelajar ba universiti empu Perintah Sarawak dikemendar milih bagi pelajar ti dikedeka sida.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, atur nya nentuka nembiak ulih nyapai juluk ati sida.

“Ba sebarang endur universiti ti diempu Sarawak, kitai enda bepanggai ba Unit Pusat Universiti (UPU).

“Nembiak deka ngambi bengkah pelajar nama? Deka belajarka pekara penerbai bilun, ambi aja. Deka belajar ekonomi, tama universiti ekonomi. Deka nyadi pilot, masuk aja, " ku iya.

Iya mansutka jaku nya ba Program Townhall 8 Taun Begulai Enggau Premier Sarawak 2025 ti diatur ba Hikmah Exchange Event Centre (HEEC) ditu, kena Hari Satu.

Nitihka jaku Datuk Patinggi Abang Zohari, chara nya ukai semina nentuka nembiak ulih ngambi pelajar ti dikedeka sida, tang ulih mega ngurangka penyampau orang nadai kereja ba Sarawak.

Nerang enggau silik, inisiatif nya bekait enggau pengeran Perintah Sarawak ti deka nyendia awak kereja strategik baka ke aeroangkasa, ekonomi satelit enggau palan data.

Ku iya, semua nya begunaka orang gawa ti ngembuan pengelandik tinggi ti dipelajar ari sistem pelajar baru.

“Enti kitai dekaka pekara ti bekaul enggau aeroangkasa, ekonomi satelit sereta palan data, kitai meseti bisi orang gawa ke chukup lalu pekara tu amat berat.

"Ketegal nya Sains, Teknologi, Kejuruteraan dan Matematik (STEM) chukup diguna, pekara wang diguna, undang-undang diguna.

“Mayuh ubah nyadi ba maya diatu lalu kitai nyendiaka bala anak bengkah pelajar strategik," ku iya.

Bela datai Sapit Premier Sarawak Datuk Amar Douglas Uggah Embas enggau Datuk Amar Profesor Dr Sim Kui Hian, Speaker Kaunsil Nengeri Sarawak Tan Sri Datuk Amar Mohamad Asfia Awang Nasar enggau Sekretari Perintah Sarawak Datuk Amar Mohamad Abu Bakar Marzuki. -EDISI UKAS