SIBU: Penegap ba pekara politik nyaup nempa penyerakup rayat ari mayuh pupu bansa enggau jalai pengarap lalu mai pemujur ngagai Sarawak maya ke diatu.

Presiden Parti Sa'ati Rayat Sarawak (SUPP) Datuk Amar Profesor Dr. Sim Kui Hian madah, penegap nya bepun ari Parti Pesaka Bumiputera Bersatu (PBB) enggau SUPP sereta disukung Parti Rakyat Sarawak (PRS) enggau Parti Demokratik Progresif (PDP).

"Premier Sarawak, Datuk Patinggi Tan Sri Abang Zohari Tun Openg udah madah maya Aum Deligit Tiga Taun Sekali (TDC) kami ba bulan siti tadi madah ke SUPP kaling kungsi ti udah meri sukung enda bebagi.

" Tu ngeringka agi kerejasama parti ti nyerakup rayat lalu mai pemujur Sarawak maya ke diatu," ku iya.

Iya mansutka jaku nya maya bejadi Pengawa Angkat Sumpah SUPP Pampang Bawang Assan ti mungkur raban nembiak, orang indu enggau komiti ungkup timpuh 2025-2027 beserimbai enggau Pengerami Taun Baru 2025 ditu, kena Hari Minggu tu tadi.

Ba pengerami nya, Datuk Amar Dr. Sim bisi ngenang nasib SUPP ba taun 2014 ti balat tusah ketegal penyarut dalam parti.

“SUPP diatu enti dibanding ba taun 2014 udah jauh bida, peda mih gaya parti diatu.

"Ketegal pengangkun kita, SUPP agi idup nyentukka diatu, tegap agi ari 10 taun ke udah," ku iya.

Ba pengerami nya, Chairman SUPP Pampang Bawang Assan, Kaunselor Kevin Lau udah nguluka komiti angkat sumpah.

Bela datai Sapit Menteri Pengerai Mensia Mayuh, Pengawa Berumah Enggau Perintah Lokal, Datuk Michael Tiang Ming Tee, Kaban Kunsil Nengeri (ADUN) Bukit Assek Joseph Chieng, Kaban Dewan Negara Senator Robert Lau enggau Sekretari Politik Premier Sarawak Kho Teck Wan.-EDISI UKAS