KUCHING: Program kaunter servis sementara deka dibuka nengah kerejasama Opis Residen enggau Pelilih Menua dikena nyaup ngisi peminta Pemeri Barang Diguna Sarawak (SKAS).

Sekretari Perintah Sarawak Datuk Amar Mohamad Abu Bakar Marzuki madah, program tu deka diatur chara berenggat di selampur Sarawak lalu deka berengkah 18 Januari 2025.

Ku iya, bisi 398,942 pom pinta bantu SKAS udah diterima iya nya 45 peratus ari penyampau tagit.

"Naka 12 Januari 2025, kitai udah nerima 400,000 pom pinta ti udah ngerijista minta SKAS," ku iya maya Majlis Amanat Perdana 2025 Premier Sarawak di Palan Konvensyen Borneo Kuching, kena Hari Satu.

Kelimpah ari nya, Datuk Amar Mohamad Abu Bakar mega ngelalau orang gawa Perintah Sarawak ngambi seruran besaup nentuka inisiatif SKAS dipejalai enggau mujur.

Ku iya nerang, pemar ke ditapi maya ngagih inisiatif bantu nengah baucer digital ba SPay Global ulih diputar enti semua meri kerejasama.

Kelimpah ari nya, iya madah, pengawa minta bantu SKAS dibuka sepemanjai taun lalu penerima dilalau ngambika enda tusah ati laban semua deka ampit bantu nya.

Iya madah, sida ke patut nerima bantu tang bedau diterima enda ibuh irau ati ketegal pinta nengah chara online deka dibuka berengkah 1 Februari nyentuk 31 Mac 2025. -EDISI UKAS