BINTANGOR: Bisi 97 nembiak mit ari 11 buah Taman Ngembing Nembiak Mit (TABIKA) Perpaduan enggau sebuah Taman Nyaga Nembiak Mit (TASKA) Genius Perpaduan, Bagi Menua Sarikei udah nerima anugerah baka setipikit ba Program Pintar Kreatif Pengerami Konvokesyen Sesyen 2024/2025 di Opis Perpaduan Bagi Menua Sarikei, empai lama.

Program diatur Opis Penyerakup Bansa enggau Integrasyen Nasional Bagi Menua Sarikei nya udah dipenyadi Kaban Kunsil Nengeri (ADUN) Meradong, Datuk Ding Kuong Hiing.

Sama datai iya nya Pegawai Penyerakup Bagi Menua Sarikei, Erma Farida Yusuf, Chairperson Pengatur Pengerami, Selimah Morsidi, bala pengajar sereta apai indai.

Maya bejaku, Datuk Ding ngasai ke pengerami nya kelai ngaku pemujur nembiak mit dalam pelajar tumu sebedau nyingkang ngagai sekula.

Ku iya, nembiak mit ti udah tembu belajat tum utu dipechaya udah ditempa nyadi orang ti ukai semina bepenemu tang mega besemekih, manah ulah sereta bebasaka apai indai enggau komuniti.

Nya kebuah, iya ngarap ke nembiak mit tu ulih terus ngerembaika pengulih sida ba sekula enggau mai ulah ti udah ditempa nengah pelajar tumu, sereta ulih napi bemacham pemar dalam pengidup enggau penuh pengandal sereta integriti.

“Kitai ngarap ke apai indai ulih begulai nyeridi enggau nempa pemereti nembiak mit ngambi sida ulih napi jeman ti penuh enggau pemar tu.

“Inisiatif enggau komitmen semua raban begulai ngemanah kualiti belajar beguna endar dikena nyapai juluk ditetapka perintah,” ku iya.

Ba pengerami nya, Datuk Ding udah ngemendar geran khas penyampau RM10,000 ngagai Opis Penyerakup Bagi Menua Sarikei, dikena nyukung enggau melanja pengawa ngatur aktiviti ti dilanggur sepanjai taun 2025. -EDISI UKAS

#UKASnews