KUCHING: Kelab Peminat P. Ramlee (KPPR) seruran ransing deka ngangkatka seni enggau main asal bepelasarka asil tengkebang Tan Sri P. Ramlee.

KPPR suah dikangau datai merindang ba mayuh bengkah pengerami, nyengkaum program penemu enggau tuju ngelaku sereta meri basa ngagai P. Ramlee. 

Nitihka penerang Tokoh Kepimpinan Pendidikan Kebangsaan 2022 Datu Dr. Adi Badiozaman Tuah, pengawa nya dikearap ulih ditampung nengah sukung ari bala tuai baka Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar.

“Kelab tu udah kala ngatur program ke sama begulai enggau bala tuai ke dulu baka  Yang di-Pertua Negeri Sarawak Tun Salahuddin enggau Tun Abdul Taib Mahmud.

"Kelab keran ngangkatka nama P. Ramlee nyadi ikon seni ti nyadi inspirasyen ngagai nembiak rebak baru. 

“P. Ramlee ukai semina nengkebang asil seni ke tebilang, tang mega bela ngundan intelektual ti tinggi sereta mengkang dibasa nyentuk ke diatu," ku iya lebuh dirandau sepengudah nemuai basa ngagai Tun Pehin Sri Dr Wan Junaidi ditu, Hari Satu.

Tuju penemuai nya dikena nerangka perambu ngatur siti  program pemerindang khas maya pengerami ngintu Hari Pengada Tun Pehin Sri Dr Wan Junaidi ila.

Program pemerindang nya mungkur pengawa belagu, betanda enggau belakun nengah sukung artis baka Adlin Aman Ramli enggau Dato’ Hairul Anwar Saleh ari Tanah Air Film.

Tanah Air Film diatu benung ngaga projek “Legasi P. Ramlee”, alai sida mega merambu ngaga dua filem biografi bekaul enggau Tan Sri P. Ramlee dalam timpoh dua tahun ti deka datai. -EDISI UKAS