SELANGAU: Peranak menua Selangau diperansang ngereja tanah sida enggau mayuh macham pengawa betanam betupi baka nanam pun kupi ti tau nambah penatai pemisi ruang bilik. 

Kaban Parlimen Selangau Edwin Banta madah, iya mega deka mantu nengah chara meri paung kupi 'Liberica'.

"Tu chara aku mantu ngangkatka sosio ekonomi rayat alai 33,600 paung kupi liberica deka diberi ngagai urung 200 penerima di Selangau," ku Edwin. 

Iya mansutka jaku nya ba Program Betemu Rayat Parlimen P214 Selangau di Rumah Bunya Jimbat di Sekuau, kena Hari Minggu tu tadi. 

Ba program nya, Edwin mega bisi nerangka polisi nyengkaum program bantu ke bisi disedia Perintah Nengeri enggau Perintah Besai. 

Iya mega nerangka senentang bantu ungkup nembiak sekula ari Selangau ti mujur nampung pelajar ngagai IPTA enggau bantu ba pekara pemati. 

Muak ke lemai, Edwin nemuai ngagai Kampung Iban Islam Sekuau lalu mendingka penusah ke bisi ditapi rayat dia. 

Ba penemuai nya, Edwin mega bisi meri projek tangki ai ketegal genturung pendiau nya bedau bisi bekal ai beresi. 

Sebedau tu, iya bisi nemuai ngagai taba nirika rumah panjai baru Rumah Samuli Chandi di Sungai Tau, Selangau.

Nangkan nya, iya ngulu Pengerami Hari Krismas sereta Taun Baru di Rumah John Antieng, Pasai Siong. -EDISI UKAS