KANOWIT: Pemujur anak ba pelajar begunaka saup ari semua lebih agi apai indai, bala pengajar, agensi printah kelimpah nembiak nya empu.
Kaban Kunsil Nengeri (ADUN) Ngemah Anyi Jana madah, dikena mulaika 'puku' ke manah ari pemujur besekula, perambu ke engkeman meseti bisi.
Ba pekara nya ku iya, Gerempung Apai Indai enggau Pengajar (PIBG) enda ulih enda besaup enggau sekula nyengkaum ngiga chara ngulihka belanja dikena ngemansangka sekula.
"PIBG mega patut bisi kaul ke manah enggau rayat mayuh di menua ngambika semua perambu ulih mulaika penguntung.
"Pia mega bala apai indai meseti bebendar ngembing pemujur anak sida ba pelajar," ku iya madah.
Iya bejaku munyi nya maya bejadika Pengerami Makai Lemai PIBG SK Nanga Tada 2024 ditu, empai lama tu tadi.
Maya nya mega Anyi minta apai indai nimbal peminta bisi anak abis nadai siku ulih nampung pelajar nyentuk datai ba renggat universiti.
Ba pengerami nya, iya bisi ngungkupka geran Projek Mit Menua Pesisir (MRP) DUN Ngemah RM5,000 ngagai PIBG SK Nanga Tada.-EDISI UKAS
