KUCHING: Sarawak terus negapka pangku pengawa nyadi nengeri ti meri perati nilai moral enggau pengelantang komuniti ba pengawa nyapai visyen pemansang manggai taun 2030.
 
Sapit Premier Sarawak, Datuk Amar Professor Dr Sim Kui Hian madah ke nilai nya, ti datai ari ajar moral lebih 100 taun ke udah ari China, diatu tyadi pugu besai nempa komuniti ti sebela enggau inklusif.
 
“Dalam timpuh pandak, lebih 300 institusyen ti meri perati ngagai pengelikun udah ditumbuh di selampur dunya, enggau Sarawak beruntung laban bela ngasai ke pemaik nya,” ku iya.
 
Iya nyebut jaku nya lebuh dirandau pemberita pengudah bejadika gerempung baru, Ji Heng Shan She di Jalai Foochow No 1 ditu kena Hari Tiga.
 
Iya ti mega Menteri Pengerai Mensia Mayuh, Pengawa Berumah enggau Perintah Lokal mega nyemetak madah ke narak nilai moral sejagat ulih ngurangka penyarut, laya enggau pampar politik di tika global.
 
“Sarawak udah nunjukka teladan dalam ngetanka penyerakup, ke alai genap pengawa diintu ngaul pupu komuniti, mandangka semangat beserakup ti tegap.
 
“Kitai begunaka semangat tu ngambi terus maju ke taun 2030,” ku iya.
 
Nambah ke nya, iya mega madah ke pemansang nengeri enda patut nuju pengaya reta tengkira aja, tang patut disandih ba pugu nilai nyadi mensia ti menyana.
 
Berebak enggau nya, iya meri terima kasih ngagai semua raban ti udah ngaul diri ba pengawa ngeranchakka pemansang moral di Sarawak, Malaysia enggau China, kelebih agi serimbai numbuh pampang baru ke-27 gerempung nya di nengeri tu ti nyadi lambang pengeran ke pengelikun enggau pengelantang begulai.-EDISI UKAS