KUCHING: Perintah Sarawak besedia deka mansik sereta berati empas ari sistem baru kereja perintah di nengeri tu.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, beberapa bengkah langgur deka diputuska sepengudah Menteri Besai Dato' Seri Anwar Ibrahim nerangka pengawa beratika atur kereja perintah di menua tu kenaka 1 Mei tu ila.
Ku iya, orang kereja perintah patut nerima insentif nyema sida mujur gawa nitihka tikas ke udah diletak.
"Aku udah minta Sekretari Perintah Sarawak, Datuk Amar Mohamad Abu Bakar Marzuki mansik empas tauka nama ke ulih nyadi ari pemutus baru nya.
"Ukai semina nya, aku mega bisi penemu nyangka manah agi ari nama ke deka dipadah maya 1 Mei nya ila," pia ku iya.
Iya bejaku munyi nya maya bejadika Pengerami Ramah Tamah Opis Premier Sarawak ke diatur Unit Matau Pengatur Pengawa Sarawak (SIMU) enggau Unit Pentadbiran (UP) di Autrium Kunsil Nengeri (DUN) Sarawak ditu, Hari Satu.
Nambahka jaku iya, Datuk Patinggi Abang Zohari mega madahka sistem Jawatan Berasaskan Caruman (JBC) engkeman dikena enti dibanding enggau Skim Pinchin Kereja Perintah.
Ku iya, ngena JBC, orang kereja perintah bisi akses mindah ari sektor kereja perintah ngagai sektor prebet kelimpah atur servis gawa mega lebih manah.
"Tu siti inovasyen ba skim kereja ke deka diberi kitai ngagai orang kereja perintah.
"Aku andal enggau tu, seagi kitai nadai penanggul ba pekara belanja, perintah ulih ngaga sistem ke manah agi ungkup orang kereja perintah," ku iya madah baru.
Ba pengerami nya, Datuk Patinggi Abang Zohari dibepasa bejadika pengawa nyuaka pemeri ari Kaunsil Pengintu Pengelantang Enggau Lumba Orang Kereja Perintah (MAKSAK) Cares enggau MAKSAK Raban Indu Sarawak ngagai 50 penerima ari Opis Premier Sarawak.
Bela datai maya nya Sapit Premier Sarawak Datuk Amar Douglas Uggah Embas enggau Datuk Amar Profesor Dr. Sim Kui Hian, Speaker Dun Sarawak Tan Sri Mohamad Asfia Awang Nassar, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom, Menteri Pengangkut Sarawak Dato Sri Lee Kim Shin, Sekretari Perintah Sarawak Datuk Amar Mohamad Abu Bakar Marzuki, Sapit Sekretari Perintah Sarawak (Pengatur Ekonomi enggau Pemansang) ke mega Chairman Komiti Pengatur Pengerami Datuk Dr. Muhammad Abdullah Zaidel, bala sapit menteri sereta pemesai ke bukai.-EDISI UKAS
