KUCHING: Penanggul bah bemusin ti ditapi Pelilih Mit Spaoh di Betong urung 250 kilometer nengah jalai darat ari ditu enggau ngelingi tebing sungai endur nya udah diputar nengah pengawa ngaga tiga pintu nyaga ai pasang surut di Sungai Spaoh, ku Sapit Premier Sarawak Datuk Amar Douglas Uggah Embas.
 
Dalam penerang ti dikeluar berindikari pejalai iya ngagai tebing ai nya kena Hari Enam, Kaban Kunsil Nengeri (ADUN) Bukit Saban nya madah diri tepantup ati enggau pengawa ti dipejalai dikena mutar isu nya.
 
“Naka diatu, projek tu udah dipejalai enggau manah dikena nagang ai sungai ari tama enggau ngampuh endur nya. Enti suba, tetiap ujan bangat enggau ai Sungai Spaoh ngelimpah, nya deka mai penanggul bah dia.
 
“Kitai mega benung nungkap projek ngemanah pekara bukai nyengkaum ngaga jalai endur bedarat enggau gazebo," ku iya ba penerang sehari tu.
 
Datuk Amar Douglas madah projek Agensi Pemansang Bagi Menua Betong (BDDA) berega RM500,000 nya udah tembu tumu ari haribulan ditetapka bulan Mei 2025.
 
Nambah ke nya, Datuk Amar Douglas mega gaga ke raban Agrobank benung ngaga perengkaguna di pasar baru Spaoh.
 
“Aku udah minta perengkaguna tu, bulan baru tu deka digaga, meri pemaik tambah peranak ditu,” ku iya. -EDISI UKAS



Kredit Berita: BERNAMA