KUCHING: Semangat pengelantang enggau penyerakup budaya pupu bansa Sarawak nyadi nyadi perati dalam video muzik Taun Baru China ti deka dikeluarka Bandaraya Kuching Selatan (MBKS).
Sapit Premier Sarawak Datuk Amar Profesor Dr. Sim Kui Hian madah ke diri meri terima kasih ngagai MBKS ti udah ngemudika projek tu.
Iya nyemetak madah ke video nya mandangka penyelai budaya Sarawak lebuh nengeri tu nyingkang nuju Strategi Pemansang Pengudah COVID-19 2030 (PCDS 2030).
“Mayuh rayat Sarawak, sereta komuniti bukai di Malaysia, udah meda peneras ubah Sarawak kandang sepuluh taun ke udah.
“Bida entara 2014 enggau 2024 nyengala endar. Tang enam taun deka datai ti beguna endar lebuh kitai neruska pejalai transformasyen tu.
“Tu beguna endar ngagai semua rayat Sarawak ngambi beserakup dikena ngintu pengelebih pemadu manah nengeri kitai – penyerakup, pengelantang, enggau pengelikun. Nilai tu mih ti deka nyadi pemun ngagai kitai nyapai pemujur, kelebih agi ngamatka juluk PCDS 2030, Sempekat Malaysia 1963 (MA63), sereta ngulihka autonomi dalam bidang pengerai enggau pelajar nyadi pengawa numbuh menua,” ku iya.
Datuk Amar Dr. Sim meri penemu nya lebuh dirandau pemberita pengudah sesyen rekoding video muzik di Taman MBKS kena Hari Minggu.
Seraya Datuk Bandar MBKS, Dato Wee Hong Seng, nyemetak madah ke tuju video nya mega ngelaku pesaka budaya kaya di sitak Padungan, enggau mandangka taba sejarah enggau mural dia.
“Video muzik tu ukai semina ngerami musin pengerami aja tang mega mandangka pemesai guna budaya enggau sejarah sitak Padungan, enggau mural ti narit ati enggau pemanah mengeri lama nya. Kami ngarap ke tu deka matak mayuh agi temuai nyerungkai sitak nya,” terang iya.
Dato Wee mega madah ke randau empai lama pasal patung mayau burak ikonik di Padungan, ti dilagu enggau gari tradisional China dikena nipakka gaya pengerami dalam video nya.
Iya nerang, enda entu engkeman mantaika patung nya ngena gari Krismas sebedau nya, mandangka konteks pengerami Taun Baru China.
“Kami meri jamin ngagai mensia mayuh ke alai kami sir uke ubah bemusim tu. Ngelagu patung mayau nitih ke gaya pengerami sebagi ari pengawa kami matak mayuh agi pengusung enggau nambahka pematak mengeri. Kami ngelaluka semua timbal penemu, kelebih agi jaku ti meri penemu ti manah, ngambi mantu kami ngemanahka agi pengawa tu,” ku Dato Wee. -EDISI UKAS
