KUALA LUMPUR: Kaunsil Olimpik Malaysia (MOM) deka ke venue pekit siti nalan dipilih ngelingi Kuching lebuh Sarawak nyadi tuai rumah begulai Lumba SEA 2027.
 
Sekretari Besai MOM, Datuk Mohd Nazifuddin Najib madah ke raban sida enggai ke venue pekit ngachir baka Lumba Malaysia (SUKMA) 2024 ti diatur di semilan bagi menua di nengeri nya, Ogos nyin tadi.
 
“Sarawak bisi minta ngatur pengerami bejadi Lumba SEA enggau sekeda lumba enggau main baka terejun, tang kitai deka ke endur ti sama laban tusah ngagai menua bukai (enti ba mayuh endur).
 
“Nama pekit ti ulih diatur di Kuching, kitai deka meri perati. Bisi mega lumba baka layar enggau engsikal trek ti nadai mayuh pilih venue, nya alai kitai deka berandau silik agi maya Komiti Pengatur Lumba SEA Malaysia (MASOC) ditumbuh ila,” ku iya madah ngagai pemberita.
 
Iya madah ke MASOC disadang ditumbuh abis laun tengan 2025 dikena nentuka Malaysia sedia nyadi tuai Gerempung Lumba SEA (SEAGF) sepengudah Lumba SEA Thailand ari 9-20 Disember ila tembu.
 
Datuk Mohd Nazifuddin madah ke MOM mega minta Serakup Lumba Nasional (NSA) mantaika keretas kereja bekaul perambu Lumba SEA Thailand enggau Malaysia dikena ngelala rintai lumba enggau pekit tambah ti deka diatur ba pekit dua taun sekali nya ila.
 
“Ari nya, baru kitai ulih ngaga pemutus sekali ke deka ngatur lumba nya tauka enda. Kelimpah ari nya, enti pengawa bejadi diatur di Sarawak, kitai deka ke penutup diatur di Kuala Lumpur,” ku iya.
 
Kelimpah ari Sarawak, mega madah ke deka nyadi pengatur begulai Lumba SEA iya nya Pulau Pinang nyadi venue snuker sereta billiard seraya Johor, tuai rumah main bol.
 
Nitih ke Atur enggau Piagam SEAGF, pengatur dikemendar ngatur lumba tambah kelimpah lumba enda tau enda baka akuatik enggau olahraga nitih atur minimum empat menua ngambi bagi.
 
Rintai kepenudi lumba enggau pekit ti dipekit patut dipadah ngagai menua bepekit abis laun 15 bulan sebedau Lumba SEA belabuh.

Haribulan ngatur Lumba SEA 2027 apin diputus.-EDISI UKAS



Kredit Berita: BERNAMA