BINTANGOR: Pengerichah pengerami nyambut Hari Raya agi mengkang diasai nyengkaum di genturung pendiau Melayu di Bintangor ditu.
Enggau nya, Pengerami Nerima Pengabang Hari Raya Aidilfitri 2024 bisi diatur Parti Pesaka Bumiputera Bersatu (PBB) Sarawak pampang Meradong begulai enggau tuai raban bansa enggau genturung pendiau Meradong.
Sapit Menteri Ba Opis Premier Sarawak (Pekara Korporat, Pemadah Enggau UKAS) ke mega Kaban Kunsil Nengeri (ADUN) Semop, Datuk Abdullah Saidol madah, peranak Bintangor nyadi chunto rayat pupu raban bansa rindu begulai enggau pangan diri.
Ku iya, pengerami Hari Raya taun tu richah agi enggau penatai pupu raba bansa ari rumah panjai enggau genturung pendiau China.
"Ukai semina nya, semua genturung pendiau Melayu Bintangor bisi mega ngatur pekit enggau program nitihka zon lalu tu matak penatai rayat mayuh," ku iya madah.
Iya bejaku munyi nya ba Pengerami Nerima Pengabang Hari Raya Aidilfitri 2024 ke diatur ba Dewan SK Abang Amin Bintangor ditu, Hari Minggu tu tadi ke bela digulu Kaban Parlimen Tanjung Manis Ir. Yusuf Abd Wahab.
Ba pengerami nya, Ir Yusuf ke mega Chairman CIDB Malaysia madah, penyerakup rayat pupu bansa di Sarawak beguna bendar ketegal rayat ditu bela bebasaka pangan diri enda ngira bansa enggau jalai pengarap.
"Tu pengelebih ke dikembuan kitai di Sarawak lalu nyadika chunto nengeri ngemeranka rambai jaku 'Maju Makmur'," pia ku iya.
Maya pengerami nya macham bengkah program enggau pekit nyempulang diatur ke digulu penyereta nitihka Zon Genturung Pendiau Melayu Bintangor. -EDISI UKAS
