KUCHING: Projek Menteri Likun, ti dipejalai Dewan Bandaraya Kuching Utara (DBKU) dikena nyaga endur ti bekaul enggau nentuka pengelikun komuniti di Kuching.
 
Ku Kaban Kunsil Nengeri (ADUN) Satok, Dato Ibrahim Baki, inisiatif ti dipun Opis Menteri Dalam Menua (KDN) tu dipejalai kenyau ari taun 2011, bulih sukung ari Opis Menteri Pengawa Berumah enggau Perintah Lokal, lalu Dewan Bandaraya Kuching Utara (DBKU) nyadi raban ti ngesan tanggungpengawa bejalaika projek nya di sitak Satok.
 
“Projek tu bejalaika sistem pengelikun ti moden agi dikena nyidi enggau nagang penyalah baka penyalah enchuri di genturung pendiau,” ku iya maya dirandau pemberita pengudah ngabas taba Projek Mengeri Likun ba mua Taman Rekreasyen Komuniti Happy Garden, Jalan Nanas, ditu kena Hari Satu.
 
Nangkan nya, iya mega ngadang ba taun baru, Projek Mengeri Likun deka dikerembai ngagai selampur sitak Kuching nyengkaum Jalai Haji Taha.
 
Ku iya, tuju besai projek tu dikena nentuka endur ti likun agi enggau komuniti nadai asai takut seraya nentuka sida idup lantang agi. -EDISI UKAS