KUCHING: Perintah Sarawak deka nyadi nengeri kedua pemadu mayuh nyaup penatai Asil Dalam Menua Kasar (KDNK) sebedau Pengawa Bepilih Besai Nengeri (PRN) nangkan tu ila.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, naka ke diatu Kuala Lumpur pemadu mayuh meri penatai ngagai KDNK menua lalu ditangkan Selangor enggau Sarawak ba penuduk lumur tiga udah ti mujur dulu ari Johor Bahru.
"Kitai meseti andal lalu ngatur pengawa ngambika KDNK kitai besai kelimpah aku mega andal kitai ulih dulu ari Selangor.
"Ulih tauka enda nya bepanggai ba baka ni kitai ngatur pelin ekonomi kitai. Kitai melabaka tu ulih dipenyadi sebedau pengawa bepilih nengeri nangkan tu ila," ku iya madah.
Iya ke mega Yang Dipertua Parti Pesaka Bumiputera Bersatu (PBB) Sarawak bejaku munyi nya maya Pengerami Ramah Tamah Aidilfitri PBB ditu, Hari Minggu tu tadi.
Nambahka jaku iya Premier Sarawak madah, juluk ati nya nyadi siti ari pemeras lalu dipandangka ngagai rayat alai atur perintah Gabungan Parti Sarawak (GPS) diatu ba jalai ke engkeman.
Kelimpah ari nya iya mega madah, PBB ransing ngembing rebak baru ngambika ulih nampung pengawa ngemansangka Sarawak dudi hari ila.
"Kitai enda ulih enda ngajar sida ba tuju nempa tuai ti kering sereta ngembuan penau megai nengeri tu lalu likun ari penanggul baka politik wang sereta ke bukai.
"Menua semampai berubah, pia mega landskap politik ti deka berubah alai sektor ekonomi diatur enggau chara baru," ku iya madah baru.
Pengerami maya nya bela digulu Sapit Yang Dipertua Parti PBB Sarawak ke mega Sapit Premier Sarawak, Datuk Amar Douglas Uggah Embas, Mandal Yang Dipertua Kanan Parti PBB Sarawak ti mega Sapit Menteri Besai, Dato Sri Fadillah Yusof, Chairman Mendam Parti PBB enggau Speaker Kunsil Nengeri Sarawak, Tan Sri Datuk Amar Mohamad Asfia Awang Nassar, Chairman Komiti Pengatur Pengerami Ramah Tamah Aidilfitri Kaunsil Besai PBB Sarawak enggau Tuai Sekretari Politik ngagai Premier Sarawak, Fazzrudin Abdul Rahman, bala mandal Yang Dipertua Parti PBB, Kaban Kaunsil Besai PBB, Veteran-Veteran Parti PBB sarawak, Kaban Kaunsil Besai Raban Indu PBB Sarawak enggau Kaban Kaunsil Besai Raban Nembiak PBB.-EDISI UKAS
