BINTANGOR: Pengerami Makai Lemai Segulai Sejalai 2024 diatur Sekula Primari (SK) Sungai Mador ngayanka sukung rat apai indai ngemujur program tu seraya negapka agi kaul entara sekula, apai indai enggau komuniti.
 
Kaban Kunsil Nengeri (ADUN) Meradong, Datuk Ding Kuong Hiing maya bejaku meri terima kasih ngagai Gerempung Apai Indai enggau Pengajar (PIBG) laban udah bebendar enggau besaup ngatur pengerami tu.
 
Iya mega muji sukung ari apai indai ngagai program sekula ti dipeda nyadi pugu nentuka penyulut nembiak.
 
Ku iya, sukung apai indai ngagai program baka tu nunjukka pengibuh sida nentuka anak bulih pelajar pemadu manah seraya negut aspirasyen SK Sungai Mador terus nempa nembiak ti nyulut dalam akademik enggau pemanah ulah.
 
Dikena nyukung inisiatif PIBG enggau sekula, Datuk Ding mega ngemendar geran khas penyampau RM5,000 dikena ngemujur aktiviti ninting taun PIBG ba taun 2025.
 
Pia mega, iya madah ke agih belanja deka disua dikena nyeleti jalai tama ngagai sekula, nemanah entepan entukar enggau nyeleti bekal kuasa karan di balai sekula nengah Projek Program Transformasyen Menua Pesisir (RTP) 2025.-EDISI UKAS