MIRI: Pemberita ngesan pangku pengawa dalam pemansang komuniti, ku Kaban Kunsil Nengeri (ADUN) Telang Usan, Dato Dennis Ngau.
 
Iya ke mega Chairman Kaunsil Dagang Temuai Sarawak (STB) madah, pemberita ukai semina ngenataika penerang tang mega meri pengeleda enggau penyungkak ubah dalam komuniti.
 
“Pemberita nya tulang belakang ngenataika berita ti betul.
 
“Pengawa sida beguna endar nentuka mensia mayuh seruran bulih penerang ti betul taja napi pemar dalam dunya berita,” ku iya maya bejaku ba Pengerami Mantar Krismas 2024 diatur Gerempung Pemberita Utara Sarawak (NSJA) di Hotel Dynasty, kena Hari Lima.
 
Ba jeman digital ti deras mansang, iya mega ngingatka surat kabar agi relevan enggau bisi tanggungpengawa kediri empu dikena negap pengandal mensia mayuh.
 
Kelai nyukung pangku pengawa pemberita, Dato Dennis mega ngemendar belanja penyampau RM7,000 ari agih belanja Projek Mit Pemansang Menua Pesisir (MRP) dikena nyaup NSJA ngatur aktiviti ulih negap pemberita di Sarawak.
 
Ku iya, belanja tu kelai ngenang jasa enggau pengelelak pemberita lalu dikearap ulih mantu NSJA terus ngatur aktiviti ke pemaik mensia mayuh.
 
Pengerami nya mega richah enggau bemacham pemerindang baka belagu nyadi pelasar negap kaul entara pemberita adap utara Sarawak.
 
Sama datai, Presiden NSJA, Chai Chon Chin sereta Chairperson Pengatur Pengerami, Jennifer Laing.-EDISI UKAS