KUCHING: Opis Pengangkut Jalai (JPJ) Sarawak deka ngena chara nyaru diri nyadi penumpang bas ekspres dikena matau deriba enggau nentuka sida nitihka atur jalai alun.
 
Sapit Menteri Pengangkut Malaysia, Datuk Hasbi Habibollah, madah inisiatif tu dikena nentuka pengelikun penumpang nengah pengawa matau ulah deriba ba rantau jalai.
 
“Kitai deka nganjung raban ti nyaru diri nyadi penumpang dalam bas ngambi matau deriba.
 
“Tu nentuka sida enda meda telefon maya deriba, nukar deriba enti bisi betukar ba takah ti udah ditetapka enggau enda deriba ngelui ari tatak jam ti dikemendar enggau enda deriba laju,” ku iya.
 
Iya madah munyi nya maya dirandau pemberita dalam Program Advokasyen Pengelikun Jalai Alun Nyerumba Musin Pengerami Krismas 2024 di Terminal Bas Kuching Sentral, ditu kena Hari Lima.
 
Nambah ke nya, Datuk Hasbi nyemetak madah ke atur terit deka dipejalai enti sema ditemu bisi ngelanggar atur.
 
“Enti raban ti nyaru diri nya tetemuka sebarang pengawa ngelanggar atur, bas nya deka diketu tekala nya enggau atur terit deka dipejalai.
 
“Serikat mega ngesan tanggungpengawa nentuka pejalai ulih ditampung nengah pengawa nukar deriba baru nitihka pematut,” ku iya baru.
 
Ku iya, operasyen tu ukai semina dipejalai maya Krismas tang mega maya pengerami bukai baka Taun Baru China enggau Hari Raya Aidilfitri.
 
Nya alai, iya ngarapka inisiatif tu dipejalai sepanjai taun. EDISI UKAS